講真,如果你唔介意濾震能力差少少,這部韓國混能車都幾好駛好用。

相信大家都聽過 IONIQ 這副底盤除了有53%由 AHSS 超高強度鋼材製造之外,最把炮就是其設計同時適用於 Hybrid、Plug-in hybrid 及 Electric,是一款打正環保旗幟的新車系。

有朋友揸緊一部掀背車,最近想換部尾廂可以載到兩部摺疊單車的環保車。佢問我點解環保車嗰樣多是怪怪的,不過就睇中咗韓仔部 IONIQ;雖然唔是超靚仔,但覺得個樣正常啲襟睇啲。由於 Hybrid 與 Electric 兩者的價格好接近,所以煩緊到底邊部最適合自己。

雖然用料不算高級,但設備好足好齊。

除非你大把青春可以花在等位充電,如果唔是,揀電動車之前一定要計劃好,最 perfect  就梗係有個私家充電位。真係諗唔掂充電位的話,其實混能都唔錯,今次試了這部 IONIQ Hybrid 四日,冷氣維持在22度,正常輕鬆揸,平均耗油錄得 4.8L/100km,跟廠方公布的 4.4L/100km 非常接近,如果採取再柔一點的駕駛方式,相信耗油量會再低一點。

只要把波棍拍入S檔就會進入 sport 模式。

我幾 like 混能版 IONIQ 只有兩種駕駛模式,唔會令人糾纏於 sport 與 sport+,又或者 sport mode 跟 S 檔那錯綜複雜又模稜兩可的感情關係之中。一着車已經自動進入 ECO 狀態,把波棍拍入 S 檔就直接換成 Sport mode,簡簡單單。雖然這副1.6公升4汽缸引擎輸出只有105ps,但電動摩打可額外提供43.5ps馬力,兩樣加埋的綜合馬力就有141ps,所以唔使擔心唔夠 power,而且 kickdown 加速仲幾好力,混能車嚟講,反應唔錯,雙離合器波箱應該幫到好多。

幾時行電幾時回充幾時油電齊發,中控台的8吋屏幕會為你現場直播。

Facelift 之後的 IONIQ Hybrid,軚盤後方多了一對 +/- 撥片,可因應行車模式有不同的功能。把波棍拍入 S 檔之後,撥片是正常的升降檔用途,用來控制 6前速 daul clutch 波箱;但如果是正常的 ECO mode,撥片功能就會變成跟純電動版 IONIQ 一樣,作為動能回收之用,這個設定可以話係世界首創;不過由於撥片有兩種用途,所以需要花點時間適應。

只有 ECO 及 Sport 兩種行車模式選擇,簡單易用。

如果用 ECO mode 行車,落斜時按一下「-」撥片,系統會啟動回充功能,而產生的阻力就有如 engine brake 的效果。回充功能共有3種阻力強度設定,最強的第三級回充電流最多,阻力有如1波的效果,像花園道這類長命斜就最啱用,不過要記住想靠降檔加速超車或上斜就要先拍入 S 檔,撥片才會改為轉檔功能,如果嫌煩可以索性直接 kickdown。值得一提的是,拍入 S 檔之後,engine start/stop 系統亦會自動關閉。

Paddle Shifter 具備能量回收及轉檔兩項功能,視乎行車模式而定。

習慣了這對兩用撥片之後,其實操作起來都幾有趣味的。IONIQ Hybrid 不設純電驅動的「EV 掣」,系統會因應電容量、路面情況及駕駛方式而自行切換純電模式,超方便唔使煩;而整個油電交接與回充過程,都會在中控台的8吋屏幕中以圖像即時顯示。

車廂空間充裕,只是隔音一般。

兩廂式設計加上容量夠大的行李艙,實用性真係唔錯,只是懸掛的濾震能力就扣咗少少分,對凹凸路面的處理唔夠幼細,但又不至於影響抓地性能。標準配備6隻喇叭、冷暖氣前座椅、Autohold、電子泊車手掣、Qi 手機無線充電、支援 Apple CarPlay 及 Android Auto,還有泊車後視鏡頭、定速巡航、自動緊急制動輔助、車道偏離輔助、車道偏離警示、電子車身動態穩定、VSM 整合式車身動態管理及上坡起步輔助等,設備媲美歐洲中型豪華房車。

Hyundai IONIQ Hybrid規格表
引擎:L4
容積:1,580c.c.
馬力:105ps@5,700rpm
扭力:15kgm@4,000rpm
傳動:前置引擎 / 前輪驅動
摩打:永磁同步電動
電池:1.56kWh鋰離子電池
馬力:43.5ps
扭力:17.3kgm
波箱:6前速雙離合配+/-轉檔
極速:185km/h
懸掛:(前)麥花臣/ (後)多連桿
制動:(前)通風碟/ (後)實心碟
輪圈:17吋合金
輪胎:225/45 R17 Michelin Primacy 3
長x闊x高:4,470 x 1,820 x 1,450mm
軸距:2,700mm
車重:1,436kg
油耗:4.4L/ 100km (Combined)
廢排:79g/km
售價:$278,800