一點五公升、電趟門、劈得下,再加埋一度好得老婆歡心的尾門,全家人都好滿意。

結咗婚,有頭家,有老有嫩,買車真係好難唔揀七人車。MPV 最大的好處自然是空間大,載運量多,其次就是一對電趟門,有咗佢,就唔怕小朋友開閂時撞花車門。

而 Stepwgn 除了可搖控開關兩側趟門之外,最正係第三排坐椅開合簡便,就算一個女人仔都可以輕鬆收摺座椅,實用性比很多大型豪華 MPV 都要高;而 WAKU WAKU Gate 的尾門設計,就算女士或小朋友都可輕易開關,比起「上下門」的設計更實用。


無天窗,對某類用家嚟講可能接受唔到,不過 Stepwgn 勝在側窗夠大,原廠仲包埋遮陽擋,視感其實都好開揚。車廂設計唔花巧,兼顧到美觀與實用,尤其鍾意佢勁多置物位置,真係連椅背椅底都唔放過,只是從中控台下方拉起的置物格深度不足,物料亦較「跣」,如果加塊防滑墊相信會好用好多。

巿面上,引擎容積在1.5公升以內的 MPV 唔多,Stepwgn 是其一,由於今代改用了渦輪增壓引擎的關係,所以既可以降低容積之餘,又能維持上一代的馬力輸出。Turbo 加 CVT 這個配搭,巿場上同樣少見,不過由於本田這副無段變速波箱的結構加強了轉波速度,所以反應都幾好幾快,再加上峰值扭力的轉數範圍廣,全套動力機關的表現都比我的預期好。

對操控有點要求的駕駛人,而又非買 MPV 不可的話,我建議試試這輛 Stepwgn,因為除了 VW 的 MPV 之外,她是另一款身高逾1.6米但入彎又唔會論論盡盡兼有幾好操控感的七人車,雖然沒有自選行車模式,但只要把波棍拍入 S 檔,利用軚盤撥片拖下波,感覺都唔錯,本田始終把駕駛放在頭位。

到底軚盤9點位置的 Cruise Control 是如何操作?
首先按下 「Cruise」鍵,儀表會亮起Cruise Main 字樣,把車速提升到所需的定速速度,再按下「-」鍵,右腳離開油門,儀表會亮起 Cruise Control,即代表已進入定速巡航。
巡航中,若想把定速速度提高或降低,可直接按下「+」或「-」鍵,每按一下,車速會提高或減少1km/h,長按就會連續增加或降低。
若定速巡航時踩油超車,當右腳離開油門之後,系統會自動回復原先的定速設定;反之,若制動減速,定速巡航就會取消,並回到 Cruise Main,需要重新設定。

Honda StepWGN Spada規格表
引擎:L4 DOHC i-VTEC
容積:1,496c.c.
馬力:150ps@5,500rpm
扭力:203Nm@1,600-5,000rpm
傳動:前置引擎‧前輪驅動
波箱:7前速CVT配軚盤+/-轉檔
懸掛:(前)麥花臣/ (後)扭力桿
制動:(前)通風碟/ (後)實心碟
輪圈:17吋合金
輪胎:(前/後)205/55 R17 Bridgestone Turanza ER33
長x闊x高:4,735x 1,695 x 1,840mm
軸距:2,890mm
車重:1,691kg
油耗:6.3L/ 100km
售價:$339,880