一輛充滿玩味,可塑造不同個性的小車,來到今代一樣沒令人失望。

RS版配備全套擾流組件。

如果一部車有近八成人都唔 like,車廠老早就要佢壽終正寢,唔會繼續畀佢獻世破壞地星生態;反之,如果好似本田 Jazz 咁得民心的話,當然要繼續 keep 住好好睇睇。

點解 Jazz 咁得民心?主要係實用性能車價都大眾化,無嘢壞,樣又唔差,改件又多,方便塑造成一部個性化的座駕,唔只中晒後生仔女口味,就算是一家三口的年青家庭都好啱用。


真皮波棍及7前速 CVT 連軚盤轉檔撥片是 RS 版的標準配置。

雖然就嚟轉款,但這輛第三代 Jazz 都好值得大家留意番,原因除咗有個寬敞的車廂之外,後座亦是同級中變化最多。標準已配備按鍵式引擎啟動、7吋觸控式屏幕連多媒體系統、斜坡起步防溜後裝置、行車穩定控制系統、三視覺及輔助泊車線顯示功能及多功能軚盤等,車仔嚟講配備都幾齊,雖然仲未有電子泊車手掣,但相信男士唔會介意。

後座獨特的結構,可以把手提袋放在櫈底。

呢代 Jazz 主要分為1.3公升及1.5公升RS兩個版本,而今次測試的,是採用 i-VTEC 引擎的 1.5 RS。RS兩字全寫係 Road Sailing,雖然跟 Racing Sport 無關,但輸出就比 1.3公升版本多了32ps@36Nm,所以都可以當佢係 Jazz 的高性能版。傳動採用7前速 CVT 波箱,大腳踩油難免慢半拍,但反應已經是同類無段變速波箱之中最快最靜。

車仔嚟講,132匹馬力算幾強,再加埋車輕,頭段加速力都有丁點推背感;中段加速力開始緩和,不過只要把波棍拍入 S 檔,就可以靠延遲轉波時間來增強中段反應。輕、直接、反應快、轉向準繩,是 Jazz 最大的操控本錢,所以揸開日本揭背車仔的話,一定唔會失望,不過我會嫌公路的胎噪會比較明顯,聽歌音量就要扭大兩格。

RS 版唔只輸出大啲,配備都好齊料,包括專用的車身顏色 Skyride Blue Pearl、全套 RS 擾流組件及黑色側鏡;車廂方面,還有真皮波棍、前座手枕、Touch Panel 冷氣操作介面、自動恆溫、定速巡航及軚盤轉波撥片等;此車另一賣點是 City Brake Assist,置於前擋風玻璃的鏡頭會探測時速在5至30公里以內的前方路況,一旦與前車距離接近,系統會先發出聲響及圖像警告,有需要時更會自動煞車,咁當然,呢套設備並唔代表鼓勵大家一邊揸車一邊睇電話。長測四天,錄得每百公里平均耗油為 7.1L,以一部20萬有找的掀背車嚟講都算齊料、慳油、實用又好揸。

Honda Jazz 1.5 RS規格表
引擎形式:L4 i-VTEC
汽缸容積:1,496c.c.
最大馬力:132ps@6,600rpm
峰值扭力:155Nm@4,600rpm
傳動形式:前置引擎‧前輪驅動
傳動系統:7前速CVT配軚盤+/-轉檔
懸掛系統:(前)麥花臣/ (後)扭力桿
制動系統:(前)通風碟/ (後)實心碟
輪圈:16吋合金
輪胎:(前/後) 185/ 55 R16 Dunlop SP Sport 2030
長x闊x高:4,050 x 1,695 x 1,525mm
軸距:2,530mm
車重:1,077kg
0-100km/h:9.6秒
極速:180km/h
耗油量:18.7km/ L (JC08)
碳排量:127g/km
售價:HK$188,880