香港人閒時最鐘意邊種小食? 一定係花生啦! 夠傳統, 百吃不厭, 茶餘飯後, 聽見事不關己嘅話題時, 都要剝吓剝吓扑扑趣。 話明事不關己, 即係唔需要負責, 花生剝完搞到一地殼。 亂拋垃圾, 人見人憎。

事不關己嘅事, 其中以見到女仔口多多, 花生消耗量特別高, 似乎呢個世界嘅女人, 已經唔再存在年輕、貌美、身材好、心地善良呢D正面特質。

無論係賽車女郎、車展Model、香港小姐、甚至係俾人無辜放上社交網站嘅過路人, 只要係女性, 都必定會被負面地評頭品足… 先唔講如果被評人係你條女定你個女、 你老婆定你老母, 聽到會有幾興… 大佬呀! 花生係要來食, 唔係要來剝架!


港男見泰妹就話係人妖… 咁外國人見你係港男就問你有冇北上尋歡、包二奶, 都好公平啫。 咪小氣呀你!

靚定唔靚, 或者點先叫做靚, 各人有唔同標準, 但係花生友其實將「醜」同「唔夠靚」撈亂晒! 講身材講得更衰, 坊間都以所謂「有波有籮」為標準理想身材, 但係… 唔係瘦到得條骨就話人肥, 瘦又話人平, 唔平又話人裝假狗, 大又話人由韓國衣錦還鄉…

見好唔讚, 見衰必彈, 但有更多人… 明明唔係衰好都彈到衰一衰! 究竟你想點先? 無論真心與否, 花生友剝完一堆花生, 張發達窿係咪會嘟一聲多左幾蚊? 剝多D係咪仲有飛行哩數? 剝少粒係咪隻手會生野?

日本妹可以話係云云港男心目中嘅女神, 但去多幾轉日本, 可能令你幻滅! 反而, 曼谷車展嘅Model, 都係嚴選當地頂級靚女。 再者, 當你多D接觸泰國人, 多D了解泰國文化, 你自然分得出係真女人定係人妖。

掉轉頭諗吓, 你班麻甩佬, 如果俾女人話你短、話你快、話你矮仔、話你地中海、話你無鬼用、話你窮L毒L… 你地係咪真係可以一笑置之咁瀟灑先?

小記對花生敏感, 但唔係消化系統敏感, 而係視覺同聽覺對花生敏感。 當聽到、見到有人剝花生時, 我真係想跳入個mon都將呢D不負責任嘅花生友叫停! 尊重吓自己, 尊重吓女性尊嚴好嗎?