第一次行頭轆,第一次用直四汽油偈,又重又大架到底掂唔掂㗎?

由初代的E50開始,Elgrand已經用緊前置V6後輪驅動(另有四驅版),動力輸出唔錯的。不過今代E52突然由後輪推動變成前輪帶動,波箱由Torque Converter全自動改為CVT無段變速,今次長測呢部250仲放棄V6用咗L4機器,驅動唔同咗又行少兩個汽缸,對佢的行車表現有少少懷疑都好正常。

View this post on Instagram

最緊要醒目

A post shared by 貓貓的車車樂園 (@automomo) on

座椅軟硬適中
由坐上駕駛席一刻開始,今代Elgrand令我最難忘係乘坐感,事關駕駛席的軟硬度啱啱好,以MPV嚟講,暫時係我坐過最fit最合體形的,無論揸長途或短途車都一樣正到暈。中座有齊手枕腳枕,肩部又有獨立斜度調校,呢項係現今大型豪華MPV的標準配備,而今次連領航席都有埋腳枕,唔使爭位坐。後排的4/6式分割座椅,可以推前24cm,唔好睇少呢個數字,全靠佢,先至可以喺唔影響座位數目之下,在行李艙放得落兩部單車;標準配備鳥瞰泊車鏡頭,就算有泊車恐懼症都唔使驚。


新增足料版
抵港的第三代Elgrand主要分為250 Highway Star AVM及350 Highway Star AVM兩款型號,而今次測試的Plus,係足料版的250 Highway Star AVM,雖然比標準版貴了$13,000,但就多咗前spoiler及電動行李艙門連足控感應裝置。

減排節能為目的
早兩代的Elgrand清一色採用V6引擎,好力,但嘥油。至於今代除了頂級版350保留V6引擎之外,仲加多咗一款首次採用L4引擎的250標準型號,目的,當然係為咗減排慳油,所以好適合唔太計較引擎爆炸力的用家。

首次直四配無段
呢副編號QR25DE的2.5公升直四機器,輸出170hp/245Nm,加速澎湃動力源源不絕呢類形容詞完全用唔着,不過坐滿人起步加速都算幾夠力,你肯踩,佢肯去,只是CVT的先天問題仍然存在,突然大油,會呆一呆,扭力先至出嚟,所以唔好忘記呢部250的目標係要節能,想要有大power的表現,可以揀有280ps的350。

操控比以往紮實
新底盤,最直接的操控感係重心比上一代低咗,彎路傾側少咗,穩定性高咗,紮實咗,雜音無晒;懸掛調校無咗上一代嗰種浮游感,緩衝反應細緻咗。改用前輪驅動之後,除非用激進的方式劈彎,入彎開始就會出現understeer,否則對整體操控影響唔大。想慳油,引擎轉數最好唔超過1,500rpm(落斜用低波拉高轉數唔計);在ECO模式下長測4天,錄得每公升汽油平均可行駛9.8km,即每百公里耗油10.2L,跟廠方公布每公升可行駛的耗油數據僅相差1km,呢個平均耗油數字比部分採用2.0公升引擎的MPV更慳油。

Nissan Elgrand 250 Highway Star AVM Plus規格表
引擎:L4 DOHC CVTC
容積:2,488c.c.
馬力:170ps@5,600rpm
扭力:245Nm@3,900rpm
傳動:前置引擎‧前輪驅動
波箱:6前速X-Tronic CVT無段變速全自動
懸掛:(前)麥花臣支柱/ (後)多連桿
制動:(前/後)通風碟
輪圈:18吋合金
輪胎:(前/後)225/55 R18 Yokohama dB decibel E70
長x闊x高:4,945x 1,850 x 1,815mm
軸距:3,000mm
車重:1,975kg
油耗:10.8km/L
售價:$459,800

相關試車

2010 Nissan Elgrand 3.5 V6

2014 Nissan Elgrand 250