相處6天,原來新一代XV唔只靜,仲非常慳油。

上一代XV,強調professional tool與trendy design,理念好似唔夠實淨。今代的大方向係 urban adventure,dynamic x solid為設計語言,目標係一輛more fun more usable的SUV,形象清晰好多。

陽光橙唔易襯
今次長測的Subaru XV,跟上次測試的版本都係屬於系列中的最高型號,標準配備最多最齊。呢隻Sunshine Orange加埋上次嗰隻Cool Grey Khaki,除咗Range Rover Evoque之外,我都諗唔到仲有邊部SUV可以襯得咁好睇。根據牛頓提出的Color Psychology,橙色代表坦率、開朗及親切,揸住呢隻鮮橙的SUV出街,心情又真係開朗啲喎。


專注降低耗油
座椅的質感有點偏硬,不過坐耐少少,就會發現呢種承托力就算長途車都唔會坐到腰酸背痛。全新開發的FB系列引擎,是由已經用咗廿年有多的EJ系列改良而成,主要針對油耗及廢氣排放;而XV呢副FB20的兩公升自然吸氣引擎,為了提工作效率,原本由皮帶帶動的雙凸輪軸改咗用金屬鏈條;口徑與衝程在保持原有的引擎體積情況下,由92×75mm改為84×90mm,目的是增加低轉速的扭力輸出;進氣及排氣活門的相對角度及間距分別由41°減少至27°及由126mm減低至104mm,使空氣獲得更大的壓縮效果而加快燃燒速度。據聞咁樣搞一搞,呢副FB20的耗油量就比舊款EJ20減少咗10個巴仙。

自動調節驅動比例
為咗引證呢副新機器是咪咁慳油,上車第一件事,我首先reset咗行車紀錄,透過中控台上方的獨立資料顯示屏,睇到呢缸油可行駛距離是640km,呢個數字係綜合過往記錄而計算出來的,所以通常跟實際行程唔會相差好遠。XV無自選行車模式,慳唔慳油就要靠自己隻黃金右腳;四驅系統屬於AWD,即係話,頭尾驅動比例會因應路況而自動調節,呢種設定好適合城巿SUV。

油耗比預期低
自然吸氣再揹住一套AWD,根據過往經驗,我預計平均耗油大約是10.8L/100km。長測6天,行駛距離合共474km,先後從港島區入過機場、流浮山及元朗,全程三大兩細,公路錄得平均耗油9.0L/100km,巿區9.6L/100km;交車時,餘下電油仲可以行160km,結果無論巿區或公路,耗油量都比我預期低,我相信部分功勞係來自Lineartronic CVT,呢副無段變速波箱除咗升檔或降檔都順到爆炸之外,起步或kickdown加速的反應都算快,無咗CVT嗰種遲鈍呆滯,只是高轉時,噪音會明顯少少,但可以接受。

偏偏少了一個盒
中控台上方的獨立資料顯示屏除咗可以用來監察耗油量及續航里數之外,仲可以選擇觀察Symmetrical AWD的驅動比例情況、路面斜度及水温油温等,呢項通常係貴價車的裝備,30萬樓下的車比較少有。值得讚下佢部可以同時支援Apple CarPlay及Android Auto的機頭,話知你部手機開邊瓣都一樣用得着;不過有樣嘢我覺得唔啱數,就係車頂位置無太陽眼鏡盒,一部咁Sunshine嘅車講唔通囉。

睇住嚟慳
自問沒有黃金右腳的話,唔緊要,儀表板中央對上有個每百公里耗油量的即時報表,系統會根據你的踩油深淺及波段來評估油耗情況,左邊愈黃用油愈多,右邊愈綠愈慳油,望住佢來調節油門深度,慢慢就可以掌握到汽車最慳油的揸法。馬力156ps,扭力196Nm,淨重近1.5噸,0-100km/h要10.4秒,唔使我講,都預計到部車加速唔會點快,唔會推背,但行車就好順好靜好舒服。老實講,28萬呢個價,對於呢部XV的整體性能表現算唔錯,人哋講到明係more fun more usable,無奶油要求人哋識飛的。

 

2017 Subaru XV 2.0i-S規格表
引擎:F4 DOHC 16V
容積:1,995c.c.
馬力:156ps@6,000rpm
扭力:196Nm@4,000rpm
傳動:前置引擎‧四輪驅動
波箱:7前速Lineartronic CVT配軚盤+/-轉檔
0-100km/h:10.4秒
極速:194km/h
懸掛:(前)獨立麥花臣/ (後)獨立雙遙臂
制動:(前/後)通風碟
輪圈:18吋合金
輪胎:(前/後)225/55 R18 98V Bridgestone Dueler H/P
長x闊x高:4,465 x 1,800 x 1,615mm
軸距:2,665mm
車重:1,440kg
油耗:7.0L/ 100km (Combined)
廢排:162g/km
售價:$279,800