對香港人來講,七人車,始終都係東瀛味啱feel啲。

無論海耶克與凱恩斯再如何論戰三百回合也好,最早由Adam Smith提出的Consumer Paramountcy Theory已經成為鐵一般的經濟事實。正如原本MPV與SUV分屬不同界別的車種,但基於價格及用途等一大堆似是而非的主觀條件,在消費者主導巿場的情況下,已成了貌離神合的競逐對手。

輸型格
SUV主攻高機動性,MPV則以高載量佔優,原本大纜都扯唔埋,但巿場就是不按章法不依常規不談道理,逐漸形成對壘局面。為了爭奪巿場,SUV開始在行李艙加裝第三排座椅;MPV都唔執輸,除了擴充裝備及換上貧燃引擎之外,亦利用先天的空間優勢創造多變的座艙布局,可惜無論點玩都好,講型格,始終都要輸畀SUV。


贏空間
不過講到實用,以車廂面積計算,擁有較高離地距來配合機動性的SUV一定會輸畀低地台設計的MPV。以今次長測的Biante為例,車廂總長達2,990mm,高度逾1,300mm,地台踏板僅離地413mm,中後排座椅更可大幅度前後滑動分別753mm及779mm,無論上落或車廂變化都勝過大型7人SUV。

七變八
Biante仲有一項特別功能,就係利用埋中排的walk-through空間,只要把兩張座椅拍埋再拉起兩邊分離式頭枕,就可以由兩座變成三座,呢個可自選7人或8人車的設計,再配合埋可增大行李艙空間的收摺式後排座椅,大大增強使用上的靈活性。值得一提的是,第三排座椅不能固定在行李艙的盡頭位置,即是話後排唔可以霸佔埋行李艙空間,呢個設定相信係基於安全理由,萬一車尾發生追撞意外,預留的行李艙空間就成了緩衝區,可減低對後座乘客的傷害。

無得輸
提起MPV,香港人一定情傾東瀛,事關齋睇設計及開揚度,日本MPV的確無得輸。雖然Biante無天窗,但呢隻米色櫳加埋大型側窗,感覺開揚兼好有假日feel。冷氣系統附有Nanoe抗敏及離子空氣淨化功能,我自問就嗅唔出經過呢個系統噴出嚟的空氣有幾清新,不過患有哮喘的大仔,通常在戶外喪跑完一輪之後,上車吹一陣冷氣例牌會有幾聲咳,但今次這部Biante就無咗呢個情況,有少少驚喜。

節能術
當大家都為了達到歐盟的排放標準而致力研發低容積高輸出的渦輪增壓引擎時,Mazda偏偏選擇回歸自然吸氣巿場,再透過波箱以及輕量化底盤等項目,構建一個名為Skyactiv的節能系統。
為了達到更好的燃油效能,Biante所使用的2.0公升Skyactiv-G引擎,除了採用大量輕量化零件之外,更把壓縮比調高至12:1,加上缸內直噴技術、Dual S-VT進排氣可變氣門正時系統及4-2-1排氣系統合共五項能改善耗油的節能技術,把耗油量及排放分別降到6.7L/100km及174g/km;長測4天,在巿區及公路各佔一半的路況之下,錄得10.5L/100km的平均耗油量。

後現代
雖然沒有時下流行的低壓turbo引擎配雙離合半自動波箱,但呢副Skyactiv-G自然吸氣配6前速SKYACTIV-Drive全自動波箱的運作一樣順滑無比,畀油起步之後,只要用毫米單位的深度吊住少少油門,部車已經好肯去,暢順度感覺似一卡懸浮在半空中前進的磁浮列車。加速反應線性,軚感輕盈,懸掛表現柔軟但不失支撐力。講真,Biante未必是一輛最好的MPV,但勝在樣樣都啱啱好,表現平均操作簡單之餘,需要時更可由7座變成8座,再加埋一個非常吸引的車價,如果Mazda真係決定集中火力迎戰SUV而全面退出MPV巿場的話,在Consumer Paramountcy的前提下犧牲了Biante,那就是凱恩斯所說的Unintended Consequences,這絕對係務實型用家的損失。

2017 Mazda Biante Granz Plus規格表
引擎:L4 DOHC 16V
容積:1,998c.c.
馬力:151ps@6,000rpm
扭力:190Nm@4,100rpm
傳動:前置引擎‧前輪驅動
波箱:6前速SKYACTIV-Drive全自動配軚盤+/-轉檔
0-100km/h:11.9秒
極速:176km/h
懸掛:(前)麥花臣/ (後)多連桿
制動:(前)通風碟/ (後)實心碟
輪圈:16吋合金
輪胎:(前/後)205/60 R16 92H Dunlop SP sport 230
長x闊x高:4,715 x 1,770 x 1,835mm
軸距:2,850mm
車重:1,640kg
油耗:6.8L/ 100km
廢排:157g/km
售價:$239,990 (車展優惠價$219,990只限10部)