號稱為AMG史上最強車型,同時亦係平治首款豪華四門轎跑車混合動力車型,擁有 843 馬力,0-100km/h只需2.9秒。

雖然廠方稱為 AMG 史上最強車型,不過全新嘅 GT 四門混合動力 E Performance外觀其實同標準嘅 GT 63 S 非常相似,車頭唯一嘅區別在於大燈下方進氣口用咗新嘅垂直,而唔係水平設計擾流。可以叫做係全新嘅係 20 或 21 吋合金輪圈,另外係車側有小小嘅紅色「E Performance」徽章,後泵把多咗個新嘅充電蓋。

平治之前只推出過量產版嘅輕混能系統,作為起步時可增加動力嘅輔助,至於全新 AMG GT 四門 E Performance 就真正係完全混合動力車。首先將普通 AMG GT 63 S 嘅 639 馬力雙渦輪增壓 4公升 V8 引擎與全新嘅 204 馬力電動摩打配合,令到全新嘅混合動力系統可發出 843hp 最大馬力,及好犀利嘅 1,470Nm 巨大扭力,0-100km/h加速只需2.9秒,極速就可達316 km/h。

廠方宣稱新嘅混合動力 AMG GT 配嘅 6.1kWh 電池設計,係源自於一級方程式賽車技術。講到咁深奧,最主要就係呢個電池比具有相同容量嘅電池更輕,並且具備巧妙嘅冷卻技術,有助在短時間內提供大功率輸出而不會過熱。明未!

全新嘅 E Performance 配備與標準 AMG GT 四門車型相同嘅 9 前速自動波之外,仲有另一個專為電動摩打而設嘅 2 前速波箱,運作同保時捷 Taycan 嘅雙速波箱類似,當啟動汽車或全力加速時會使用較低嘅檔位,當巡航時就會切換到高檔位,減少電能消耗。當然,即使你用緊手動模式轉波, 電動摩打都會配合埋 9 前速自動波箱自動運作嘅。

至於駕駛模式基本與普通型號相同,包括Comfort,Sport,Sport+,Race及Individual,不過仲加多一個新嘅Electric模式,可以畀雙渦輪增壓 V8引擎休息吓,就算在凌晨時候返屋企唔會嘈醒鄰居啦。